Djadumingu awor, promé di yüni, temporada di orkan 2008 pa Region Atlántiko di Orkan (parti nort di Osean Atlántiko, Laman Karibe i Golfo di Mèksiko) ta kuminsá ofisialmente. E temporada aki lo terminá atrobe riba 30 di novèmber.

E kantidat di siklon tropikal ku a forma aña pasá den e region aki tabata ku diessinku tormenta tropikal, seis orkan i dos orkan fuerte, mas o ménos igual na e promedio di hopi aña (diesun tormenta tropikal, seis orkan i dos orkan fuerte).

Durante di mainta di 17 di ougùstùs 2007, orkan Dean a pasa na un distansha seif (mas o ménos 350 kilometer) sùit di Islariba (wak e imágen di satélite na man drechi). A pesar di esaki tòg a registrá ráfaga di bientu ku a alkansá forsa di tormenta (95 km/ora) riba e islanan aki. E orkan aki a yega tera kuater dia despues na estado Yucatán na Mèksiko komo un sistema di kategoria sinku i tabata responsabel pa un total di 32 hende ku a pèrdè nan bida den Área di Karibe i Mèksiko.

Orkan Felix a pasa nort di Islanan ABC na un distansha di mas o ménos 85 kilometer durante di mardugá i mainta di 2 di sèptèmber (wak e imágen di radar, aki bou). Esaki a resultá den laman brutu i áwaseru ku tabata lokalmente fuerte. Velosidat di bientu riba e islanan aki a alkansá mas o ménos 70 km/ora den ráfaga. Felix tabata e di tres orkan fuerte den kuater aña (Ivan na 2004 i Emily na 2005) ku a pasa bastante serka di Islanan ABC. Felix a yega tera dos dia despues, komo un orkan di kategoria sinku, banda di frontera entre di Nicaragua i Honduras i a kousa un kantidat di 130 víktima den e region aki.

Na final di òktober i prinsipio di novèmber, tormenta tropikal Noel a pasa over di Repúblika Dominikano i Haiti. Pa motibu di áwaseru fuerte i persistente, mas ku 160 víktima a kai den e dos paisnan aki miéntras ku 50 persona a ser raportá komo perdí.

Pa motibu ku e tres sistemanan aki a kousa un kantidat basta grandi di morto i tambe hopi daño material den Área di Karibe i Sentro Amérika, e nòmbernan Dean, Felix i Noel a ser retirá dor di miembronan di e asina yamá Komité di Orkan di RA IV di Organisahon Mundial di Meteorologia (OMM) durante di nan reunion anual na Orlando, Florida na Merka. E nòmbernan aki na 2013 lo ser reemplasá dor di respektívamente Dorian, Fernand i Nestor.

Pronostikadónan un biaha mas ta antisipá un temporada di orkan bastante aktivo ku un kantidat di tormenta tropikal i orkan riba e promedio di hopi aña. E pronóstikonan aki di tantu Colorado State University i National Weather Service na Merka ta basá riba entre otro temperatura di laman den Osean Atlántiko i Pasífiko, distribushon di preshon di aire i e bientunan relashoná ku esaki riba Atlántiko. E pronóstikonan aki no ta duna ningun indikashon na ki momentu ni na unda e sistemanan pronostiká lo desaroyá ni kon nan lo bai move. Pa e motibu aki ta urgi outoridat i pueblonan lokal di nos islanan pa prepará adelantá i pa tuma e prekoushonnan nesesario den kaso ku emití alerta i atvertensha.

Manera ta kustumber, Servisio Meteorológiko di Antianan Hulandes i Aruba (MDNAA) lo sigui desaroyo di e sistemanan aki i otro áreanan di mal tempu ku ta menasá tantu Islariba komo Islanan ABC, ku hopi atenshon. Den kaso ku esei ta nesasario, e servisio aki lo emití alerta òf atvertensha na tempu den kordinashon estrecho ku National Hurricane Center na Miami, Florida, ku ta un asina yamá Sentro Meteoroloógiko Regional Espesialisá di Organisashon Mundial di Meteorologia. Riba un eskala nashonal, nos lo ko-ordiná ku outoridatnan di kombatimentu di desaster riba kada isla pa konsientisá públiko riba e peligernan ku e sistemanan aki ta forma di manera ku nan por prepará nan mes pa temporada di orkan. Lesa mas informashon riba siklon tropikal den nos brochure ku yama Hurricanes and Tropical Storms in the Netherlands Antilles and Aruba ku por ser hañá riba nos página di Internet (http://www.meteo.an).

E nòmbernan ku a ser prepará pa e temporada di orkan aki ta: Arthur, Bertha, Cristobal, Dolly, Edouard, Fay, Gustav, Hanna, Ike, Josephine, Kyle, Laura, Marco, Nana, Omar, Paloma, René, Sally, Teddy, Vicky i Wilfred. 

Un bon preparashon i ko-ordinashon ta esensial pa limitá daño personal i daño material!